"Hayu Urang Saradia", Nadom Panineungan Tarhiman Subuh

Hayu Urang Saradia

Hayu urang saradia 

Meungpeung keur hirup di dunya

Amal keur sampeureun tea

Di ahir moal sulaya 

Geuning maot ngadodoho 

Boro sok dipoho-poho

Datangna teu mere nyaho

Ngageretek taya tempo

Taya beurang taya peuting

Taya raja taya kuring

Di mana ajal geus sumping

Teu meunang embung anaking

Horeng nyawa reujeung badan

Nu geus lila babarengan

Datang mangsa pipisahan

Paturay tineung pamitan

Lain meureun lain sugan

Da ieu mah kanyataan

Kabeh pasti ngarandapan

Geuning awak urang pisan

Kaget reuwas mata mencrong

Renghap ranjug munggah bengong

Napas ngangseg na genggerong

Nu deukeut geus teu katembong

Horeng ieu teh sakarat

Dicabut ku malaikat

Nyawa ngangseg mapay urat

Teu aya daya keur lumpat

Ku renghap nu panganggeusan

Pegat sakabeh harepan

Ngabengkang taya dayaan

Rek kumaha pangharepan

Boro mah keur suka bungah

Ngatur napsu seuri bungah

Beak tempo kudu pindah

Nyampeurkeun ka alam barjah

Geus waktu ninggalkeun lembur

Ngajugjug ka alam kubur

Meunang ngali geus diukur

Mahi keur awak sakujur

Rek naon anu dibawa

Duit atawa sawah lega

Meunang ngumpul-ngumpul tea

Belaan nipu pasea

Beunang tisuksruk tidungdung

Nu sok dipake adigung

Kana salat matak liwung

Waktuna jakat mah embung

Ibadah kateler-teler

Nepi ka nyanghulu ngaler

Lapur badan eunggeus komper

Di tengah imah ngagoler

Ngajolopong diruruban

Diriung ditarungguan

Geumpeur pacampur jeung reuwas

Setan mah bati mupuas

Harta anu ngunung-ngunung

Pakean duit satungtung

Ngan ukur boeh asiwung

Ditambah kai keur padung

Lawang amal geus ditutup

Hanjakal keur waktu hirup

Talangke bet henteu sanggup

Padahal waktu mah cukup

Paingan Rosul ngelingan

Dunya mah pangumbaraan

Naha bet kamalinaan

Tonggoy teu nyubadanan

Ati ngerik pikir liwung

Imah tiiseun jeung suwung

Ngan anak yatim laliwung

Ting garisik ting rariung

Abong poe panganggeusan

Mana beurat rek amitan

Keun imah keun pakarangan

Geuwat keun logak ngantosan

Pasaran mendung dipayung

Ti luhur dirurub sarung

Nu ngiringna semu nguyung

Nangkeup dada tingkuyungkung

Ngaleut ngeungkeuy ngabandaleut

Beuki deukeut beuki deukeut

Beuki deukeut beuki deukeut

Kana logak rupek heureut

Duh geuning enggeus nyangkorah

Rup ku padung rap ku lemah

Poek rupek jeung tugenah

Ngarumas pinuh kasusah

Ahli sobat kawawuhan

Teu nolih gancang bubaran

Duh saha nu rek maturan

Geusan cicing babarengan

Mana sobat mana dulur

Geuning buriak salembur

Henteu maturan di kubur

Sok komo nambahan umur

Oge harta banda kuring

Nu dipuhit beurang peuting

Cik mana anu rek ngaping

Geuning geus kieu mah kuring

Hanjakal aduh hanjakal

Teu getol sadia amal

Padahal geuning padahal

Ngan amal nu jadi bekel

Naon keur panyinglar sedih

Nahan ku cimata getih

Tawa bangkieung jungkelih

Harta mah geuning teu nolih

Enggeus montong rek sasambat

Teu guna enggeus kaliwat

Bongan bareto teu toat

Teu kurang nu nganasehat

Tong hantem hahanjakalan

Pan teu kurang nu ngelingan

Pek tunggu jawab sorangan

Geura jawab pariksaan

Pangemutan parantosan

Mangga geura aremutan

Sugan manawi jeung sugan

Ngajadi kamaslahatan

Ku maca ieu pepeling

Muga sing jadi panggeuing

Da Gusti Anu Ngajaring

Siang jeung wengi diaping

(Tarhiman di Ciakarkolot – Garut, 1989)

Syi'ir Tanpo Waton Versi Basa Sunda

Nadom Pangeling Diri

TARJAMAH SYI’IR TANPO WATON

Yasana : KH Mohammad Nizam As-shofa Pimpinan Pesantren Ahlus-Shofa Wal-Wafa

Wonoayu – Sidoarjo, Jawa Timur

Ya Rosulalloh salaamun'alaik # Ya Rofi'asyaani waddaarojii

'Athfata Ya Jiirotal'alaami # Ya Uuhailal juudi walkaromi.....2X

Ngawitan abdi maos syi’iran
Kalawan muji Gusti Pangeran
Dzat Nu Maparin rahmat kani’matan
Siang jeung wengi teu itung-itungan 2x

Duh dulur-dulur ka sadayana
Ulah mung ngaji wungkul syare’atna
Kur pinter dongeng, nulis jeung maca
Ahirna hungkul meunang sangsara 2x

Loba nu apal Qur’an jeung Hadist
Seneng ngafirkeun jalma lianna
Kafir sorangan teu dipalire
Padahal masih kotor hatena 2x

Gampang kabujuk nafsu angkara
Dina hiasan gebyarna dunya
Iri jeung dengki beunghar tatangga
Jadi atina poek jeung nista 2x

Yu dulur-dulur ulah mopohokeun
Wajib ngaji jeung kana ningkatkeunna
Pikeun ngandelkeun Iman Taohidna
Saena bekel mulya maotna 2x

Jalma nu soleh sae atina
Margi sampurna kaelmuanana
Ngangge thoriqot sareng ma’rifatna
Dugi hakekat lebet manahna 2x

Al-Qur’an Qodim wahyu nu mulya
Henteu ditulis bisa dibaca
Eta wejangan guru waskita
Ditancebkeun dina jero dada 2x

Nempel na ati reujeung pikiran
Asup na badan ka beh jerona
Mu’jizat Rosul jadi pedoman
Minangka jalan lebetna Iman 2x

Kalawan Alloh Nu Maha Suci
Masrahkeun diri siang jeung wengi
Ditirakatan di-riyadhohan
Dzikir jeung suluk ulah dipohokeun 2x

Hirupna tengtrem ngarasa aman
Eta teh tanda jalma nu Iman
Sabar narima najan pas-pasan
Sadaya takdir ti Gusti Pangeran 2x

Ka dulur, batur reujeung tatangga
Kudu rarukun ulah pasea
Eta teh sunnah Rasul nu mulya
Nabi Muhammad panutan urang 2x

Yu ngalakonan sakabehanna
Alloh bakal ngangkat darajatna
Sanajan handap darajat lahirna
Tapi mulya mungguh Alloh Ta’ala 2x

Mun timang mangsa dina ahirna
Moal kasasar eroh jeung sukmana
Di puji Alloh surga tempatna
Weuteuh mayitna oge kafanna 2x

Diserat deui ku : Syihabudin

Masjid Al Ikhlash RW.08 Pasanggrahan Ujungberung