Fiksimini Sunda "BAJU LEBARAN" Karya : Yi Syihabudin

Baju Lebaran

Kahirupan Osa kawilang sugih, hasil tina ngokolakeun pausahaan rajut bogana. Najan kitu manéhna teu iyeuh obah pangadatan jojodog unggah ka salu. Unggal bulan puasa ngahaja pabrik eureun. Lamun ras ka indungna, langsung nyegruk bari nangkeup bungkusan.

Paceklik entak-entakan. Ceu Encoh jeung baturna geus saged rék derep. Osa nu umurna genep taun dipihapékeun ka Nini Onah. "Nin ari Ema iraha balikna?" ceuk Osa. "Ké piisukeun takbiran, panan bari mawa baju keur Osa," témbal Nini-na.

Piisukeun lebaran lembur eur-eur, sabab aya ambulan nu mawa layon Ceu Encoh. Nu kapanggih di Cimanuk nyangked dina kakayon. Ceuk Bi Maé, cenah waktu maranéhna meuntas walungan Cimanuk lebah Bojongrongod ngadadak aya caah déngdéng. Teu nolih kana babawaan, Bi Maé ngarontok Ceu Encoh nu ngaléngléong kabawa palid. Tapi ukur kajéwang leungeunna nu nyepeng bungkusan baju.

Osa nginghak bari nangkeup baju lebaran titinggal indungna. Nu layonna keur digarotong ka astana. Ti harita bungkusan baju tara lésot dibabawa.

Fiksimini Sunda "CINYUSU DI JURU SITU" Karya : Yi Syihabudin

Cinyusu Di Juru Situ

Pancuran tina awi nu meunang ngarojok ku linggis. Galadagna tina guluntungan awi dualas siki sadeupaan. Pipindingna awi dianyam jiga paranjé. Titincakanna batu nu geus leucir balas ku mindeng kajijekan.

Cai ngabulak teu saat-saat, hérang ngagenyas. Katempo ti luhur peupeundeuyan keur ngudag kini-kini, impun gé pating alabring mapay-mapay sisi kulah. Teup euntreup papatong emas dina kayambang nu ngangkleung. Keteyep suku ngaléngkah lalaunan, curuk jeung jempol geus tatan-tatan rék néwak buntutna. Krep..., geleber..., nyamos.

Beuki jauh kuring ngudag, beuki jero papatong emas hiber ka kulah. Les ngiles. Kuring culang-cileung, leungeun dibebetot ka handap. Kaciri lapat-lapat di luhur, galadag geus salin rupa ku éntépan batu. 

Teu bisa hojah. Nyusup, mubus, ngoréhkeun nu meungpeukan cinyusu. Weléh teu panggih. Kuring halabhab dina ngemplangna kulah. Teuing nepi ka iraha. Roroésan. Taya tangan pangawasa.