Kalénder Maséhi 3 Abad, Tutungkusan Waktu Ngobong

Ieu tulisan ngarupakeun catetan alakadarna pikeun nyangreud kanyaho nu teu sataikuku-taikuku acan malar bisa dibuka lamun poho deui, sok sanajan pun guru KH. Fasya nyebatkeun "Al'ilmu fishudur laa fiquthur" ari élmu éta nu geus nyampak dina haté / uteuk lain nu aya dina tulisan.

Pikeun nganyahokeun taun maséhi boh taun nu geus kaliwat atawa nu bakal datang cukup ku nganyahokeun heula tanggal 1 Maret. Ti tanggal 1 Maret ieu kari ngitung saloba naktuna masing-masing bulan nu geus ditangtukeun.

Conto 1 : Dikanyahokeun yén tanggal 1 Maret 2016 éta poé Salasa. Poé naon tanggal 1 Oktober 2016?

Jawab : Naktu bulan Oktober (5) geus kitu itung ti mimiti poé Salasa (1 Maret 2016) saloba naktu bulan Oktober (5) nyaéta ninggang dina poé Saptu. Jadi 1 Oktober 2016 éta poé Saptu.

Conto 2 : Dikanyahokeun yén tanggal 1 Maret 2017 éta poé Rebo. Poé naon tanggal 1 Mei 2017?

Jawab : Naktu bulan Mei (6) geus kitu itung ti mimiti poé Rebo (1 Maret 2017) saloba naktu bulan Mei (6) nyaéta ninggang dina poé Senén. Jadi 1 Mei 2017 éta poé Senén.

Dihandap geus disadiakeun tabél Naktu Bulan. Tinggal ningali naktu masing-masing bulan.

Sajaba éta geus dijieun ogé tabél tanggal 1 Maret salila 3 (tilu) abadeun. Taun Basitoh jeung Taun Kabisatna geus dipisahkeun. Tinggal nyocogkeun wungkul loyog jeung conto diluhur.

Perlu ditengetkeun, husus pikeun ngitung tanggal 1 bulan Januari jeung bulan Februari, patokan tanggal 1 Maret dicokot tina taun saméméhna. Upamana urang hayang nganyahokeun tanggal 1 Januari 2017, mangka patokanna ngitung ti tanggal 1 Maret 2016 nyaéta poé Salasa. Ngitung saloba naktu bulan Januari (6) ti poé Salasa, jadi tanggal 1 Januari 2017 éta ninggang di poé Minggu.

Cag heula sakitu. Mugia aya mangfaatna.